“ECH A MÄI VËLO”

“Ech a mäi Vëlo” ass eng Promotiouns-Campagne fir de Vëlo, an d’Liewen geruff a gesponsert vum Lycée Ermesinde, a realiséiert vun der Entreprise B.A.M. fir eis Communautéit dozou ze beweegen méi oft mam Vëlo an d’Schoul ze fueren.

An dësem Kader huet de LEM en neien zouenen, iwwerdaachten an elektronesch gesécherte Vëlo’s Parking gebaut, deen nëmmen mat engem elektroneschen Accès zougänglech ass.

Donieft bitt de B.A.M, fir déi déi den Parking reegelméisseg notzen, e gratis Service un, a botzt a préift deene Léit hire Vëlo eemol de Mount (Bike Check & Wash). Well mir awer wëssen datt net jiddereen mam Vëlo an d’Schoul komme kann, an awer och déi wëlle belounen, déi an der Fräizäit op de Vëlo klammen, bidden mir dëse Service och fir all anere Member vun eiser Communautéit un.*

Zousätzlech maache mir zweemol am Joer (virun der Summer- an der Wanter-Vakanz) en Dekont vun all de gefuerenen Kilometer a belounen déi Bescht an der jeeweileger Kategorie mat flotte Präisser, natierlech “made by LEM”.

Dofir klammt elo all op de Vëlo a mellt iech u fir des Aktioun am Atelier vun der Entreprise BAM.

*Fir vun dësem gratis Service ze profitéieren, sollt dir min. 2x d’Woch wärend engem Mount Vëlo gefuer sinn, an eis di zréckgeluechten Trajete per Screenshot vun all belibeg Applikatioun op bam@lem.lu um Enn vum jeeweilege Mount schécken.